Исроилда Нетаняҳунинг рақибига имконият берилди: янги ҳукуматни шакллантириш унга топширилди
Бу қарор парламентдаги кўпчиликни йўқотган амалдаги бош вазир Бенямин Нетаняҳунинг ҳокимиятда қолиш имкониятларини янада мураккаблаштирди.
Исроил президенти Исаак Герцог мухолифат етакчиларидан бири Гади Айзенкотга янги ҳукуматни шакллантириш ваколатини беришга қарор қилди. Унга коалиция тузиш учун олти ҳафтагача вақт ажратилади. Бу ҳақда Associated Press хабар берди.
Айзенкотнинг номзоди 27 октябр куни бўлиб ўтган парламент сайловларидан кейин сиёсий партиялар билан ўтказилган маслаҳатлашувлар натижасида танланган. Бу қарор амалдаги бош вазир Бенямин Нетаняҳу учун навбатдаги сиёсий зарба бўлди. Сайлов натижасида унинг коалицияси парламентдаги кўпчиликни йўқотган.
Сайловда Нетаняҳунинг сиёсий блоки 53 та, Айзенкот бошчилигидаги мухолифат 48 та, араб партиялари эса жами 19 та ўринни қўлга киритган. Ҳукумат тузиш учун 120 ўринли Кнессетда камида 61 та депутатнинг қўллаб-қувватлаши талаб этилади.
Айзенкот ҳукуматни шакллантириш учун учта асосий йўлдан бирини танлаши мумкин: Нетаняҳу билан ҳокимиятни бўлишиш, араб партиялари кўмагига таяниш ёки ўта консерватив диний партиялар билан келишиш.
Бироқ бу вариантларнинг ҳар бири сиёсий келишмовчиликлар билан боғлиқ. Хусусан, Айзенкот ва унинг иттифоқчилари ўта консерватив яҳудийлар учун ҳарбий хизматдан озод этиш имтиёзларини бекор қилиш тарафдори. Диний партиялар эса мазкур имтиёзларни сақлаб қолишни талаб қилмоқда.
Араб партияларининг кўмагига таяниш ҳам мухолифат ичида бир хил қўллаб-қувватланмаяпти. Айзенкотнинг айрим иттифоқчилари улар билан коалиция тузишга қарши. Шунга қарамай, парламентдаги икки араб партияси жами 19 та ўринни қўлга киритган ва Айзенкотни қўллаб-қувватлашга тайёрлигини билдирган.
Айни пайтда Нетаняҳу Айзенкотнинг ҳукумат тузишига тўсқинлик қилишга уринмоқда. У шанба куни мухолифат етакчисини «миллий бирлик ҳукумати»ни шакллантиришга чақирган. Шунингдек, Нетаняҳу араб партиялари билан иттифоқ тузишни хиёнат деб баҳоламоқда.
Айзенкотга ҳукумат тузиш учун дастлаб 28 кун берилади. Президент бу муддатни яна икки ҳафтага узайтириши мумкин. Агар у муваффақиятсизликка учраса, ҳукумат шакллантириш имконияти Нетаняҳуга берилиши мумкин. У ҳам коалиция туза олмаса, Исроилда келаси йил баҳорида навбатдан ташқари парламент сайловлари ўтказилади.
Янги сайланган Кнессет депутатлари сешанба куни қасамёд қилади. Янги ҳукумат тузилгунига қадар Нетаняҳу ва унинг маҳкамаси чекланган ваколатлар билан муваққат ҳукумат сифатида фаолият юритади.
