Россия Украинага янги зарба беришга тайёрланмоқда — Зеленский
Украина президенти Украина Ҳаво кучлари ва Қуролли кучлари эҳтимолий ҳужумдан ҳимояланишга тайёргарлик кўраётганини билдирди.
Россия Украина энергетика ва фуқаролик инфратузилмаси объектларига, шунингдек, Днепр дарёси устидан ўтган кўприкларга янги зарба беришни режалаштирмоқда. Бу ҳақда Украина президенти Володимир Зеленский разведка маълумотларига таяниб маълум қилди.
Унинг сўзларига кўра, Украина Ҳаво кучлари ва Қуролли кучлари эҳтимолий ҳужумдан ҳимояланишга тайёргарлик кўрмоқда. Бироқ бу осон бўлмаслиги таъкидланган.
Зеленский ҳаво мудофаасини кучайтириш учун «Patriot» тизимларига мўлжалланган тутиб қолувчи ракеталар зарурлигини билдирди. Шунингдек, у халқаро ҳамкорларни ҳарбий ёрдам ва қурол-яроғ етказиб беришни кечиктирмасликка чақирди.
Украина президенти Россиянинг асосий тактикаси электр тармоқлари, трансформаторлар ва электр энергиясини тақсимлаш қурилмаларини йўқ қилишдан иборат эканини қайд этди.
Унинг таъкидлашича, айрим ҳудудларда электр энергияси ишлаб чиқариш ҳажми етарли бўлса-да, инфратузилмага етказилган зарар туфайли электр таъминотида тақчиллик сақланиб қолмоқда. Мавжуд муаммоларни бартараф этишда таъмирлаш ишларини тезкор амалга ошириш муҳим аҳамиятга эга.
