Японияда 5,7 магнитудали зилзила содир бўлди: камида 22 киши жароҳатланди

Япония марказида якшанба куни эрта тонгда 5,7 магнитудали зилзила юз берди. Оқибатда камида 22 киши жароҳатланган, дўконларнинг ойналари синган ва аҳоли биноларни тарк этишга мажбур бўлган. Бу ҳақда AP хабар берди.

 

Япония Метеорология агентлиги зилзила магнитудасини 5,7, АҚШ Геология хизмати эса 5,5 деб баҳолаган. Ер силкиниши Шизуока префектурасида, тахминан 40 километр чуқурликда, маҳаллий вақт билан соат 01:04 да қайд этилган.

 

Зилзила Аичи, Шизуока, Гифу, Яманаши, шунингдек, Киото ва Нара ҳудудларида сезилган. Энг кучли силкиниш Аичи префектурасида кузатилган. Жароҳатланганлар орасида зилзила вақтида бинодан чиқишга уриниб, зинапоядан йиқилганлар ҳам бор.

 

Япония Метеорология агентлиги келгуси бир ҳафта давомида, айниқса, яқин икки-уч кун ичида кучли зилзилалар юз бериши мумкинлигидан огоҳлантирди.  Аҳолига кўчки, тош қулашлари ва ёғингарчилик оқибатларидан эҳтиёт бўлиш тавсия этилган.

 

Ҳозирча кучли зилзила юз бериши мумкинлиги тахмин қилинаётган Нанкай ботиғидаги тектоник плиталар чегарасида ноодатий ўзгаришлар аниқланмаган. Хавфсизлик чораси сифатида зилзила таъсир кўрсатган ҳудудларда Шинкансен тезюрар поездлари ҳаракати тезлиги пасайтирилган.

 

Маълумот учун, Япония сейсмик фаоллиги юқори ҳудудда жойлашган. Шу сабабли мамлакат расмийлари аҳолини фавқулодда вазиятлар учун ичимлик суви, озиқ-овқат ва батареялар захирасини тайёрлаб қўйишга чақириб келади.