Терговчи ва адвокат 40 минг доллар пора билан ушланди
Терговчи жиноят ишини гумонланувчи фойдасига тугатиб бериш эвазига адвокат орқали пул талаб қилган.
Наманган вилоятида терговчи ва адвокат пора олиш ҳамда воситачилик қилиш ҳолати бўйича қўлга олинди. Бу ҳақда ДХХ хабар берди.
Маълум қилинишича, Наманган вилояти ИИБ Тергов бошқармаси терговчиси ўзининг иш юритувида бўлган, Чуст туманида яшовчи, 2006 йилда туғилган фуқарога нисбатан қўзғатилган жиноят ишини унинг фойдасига ижобий ҳал қилиб, тугатиб бериш эвазига ишга алоқадор бўлмаган адвокат орқали 40 минг АҚШ доллари талаб қилган.
Чуст туманида ўтказилган тезкор тадбирда адвокатлар ҳайъати адвокати гумонланувчининг отасидан 40 минг АҚШ долларини олган вақтида ашёвий далиллар билан қўлга олинган.
Сўнгра тезкор тадбир давом эттирилиб, терговчи адвокатдан 30 минг АҚШ долларини олган вақтида ноқонуний ҳаракатга чек қўйилган.
Ҳозирда терговчига нисбатан Жиноят Кодексининг 210-моддаси (пора олиш) билан, адвокатга эса ЖКнинг 212-моддаси (пора олиш-беришда воситачилик қилиш) билан жиноят иши қўзғатилиб, “қамоқ” эҳтиёт чораси қўлланилди.
