Ўзбекистон ва Россия ўртасида инсон капиталини ривожлантириш қўшма онлайн-платформасини яратиш таклиф этилди
Платформанинг вазифаси таълим, касбий тайёргарлик ва меҳнат бозорини ўзаро боғлашдан иборат.
Ўзбекистон Президенти Шавкат Мирзиёев Петербург халқаро иқтисодий форумидаги нутқида Ўзбекистон ва Россия ўртасидаги ҳамкорликни янги босқичга олиб чиқиш мақсадида қўшма рақамли экотизим ҳамда инсон капиталини ривожлантиришга қаратилган онлайн платформани яратишни таклиф этди.
Давлат раҳбарининг таъкидлашича, қўшма рақамли экотизимнинг дастлабки босқичи рақамли савдо ва шаҳар сервисларини тартибга солиш қоидаларини яқинлаштириш, икки мамлакат брендларини ҳамкорликдаги платформаларда илгари суриш, бандлик бўйича ягона рақамли профиль яратиш ҳамда сунъий интеллект асосидаги маҳсулотларни ривожлантиришни қамраб олиши мумкин.
Президентнинг қайд этишича, бундай ташаббуслар бизнес учун янги бозорларни очиб берса, фуқаролар учун қўшимча даромад топиш имкониятларини яратади.
Шавкат Мирзиёев рақамлаштириш жараёнларида инсон омили устувор аҳамиятга эга бўлиши кераклигини таъкидлаб, Ўзбекистон дунёдаги энг ёш давлатлардан бири эканини, аҳолисининг ярмидан кўпроғини ёшлар ташкил этишини эслатди.
Давлат раҳбари ёшларни замонавий билим ва кўникмалар билан таъминлаш билан бир қаторда, уларнинг салоҳиятини рўёбга чиқариш учун зарур шароитларни яратиш муҳимлигини қайд этди. Шу нуқтаи назардан таълим ва кадрлар тайёрлаш соҳасидаги ҳамкорлик алоҳида аҳамият касб этиши таъкидланди.
Маълум қилинишича, бугунги кунда Ўзбекистонда 32 та хорижий олий таълим муассасаси филиали фаолият юритмоқда. Шундан 15 таси Россия олийгоҳларига тегишли бўлиб, бу Россиянинг хориждаги энг йирик университетлар тармоғи ҳисобланади.
Президент касбий таълимни ривожлантириш ва амалиётга йўналтирилган кадрлар тайёрлаш дастурларини кенгайтириш зарурлигига ҳам эътибор қаратди. Онлайн таълим сервисларини ривожлантириш ёшларнинг, жумладан, чекка ҳудудларда яшовчиларнинг сифатли билим олиш имкониятларини кенгайтиради ҳамда меҳнат мобиллигини янги босқичга олиб чиқади.
Шу муносабат билан Шавкат Мирзиёев таълим, касбий тайёргарлик ва меҳнат бозорини ўзаро боғлайдиган Инсон капиталини ривожлантириш бўйича қўшма онлайн платформани яратишни таклиф этди.
Давлат раҳбари таъкидлашича, мазкур платформа таълим дастурлари, хорижий тиллар ва ахборот технологиялари курслари, ёш тадбиркорларни қўллаб-қувватлаш механизмлари ҳамда иш берувчилар билан мулоқот имкониятларини бирлаштириши мумкин.
Бу тизим ёшлар учун янги иқтисодиётга йўл очади, бизнесни малакали кадрлар билан таъминлайди ҳамда таълим муассасаларига меҳнат бозорининг реал эҳтиёжлари билан самарали ишлаш имконини бериши қайд этилди.
