Қаршида ҳоким ўринбосарининг ходимларга қўпол муносабати юзасидан ўрганиш бошланди
Ходимларни дам олиш кунлари ишга жалб қилиш ва уларга нисбатан ҳақоратли муносабатда бўлиш ҳақидаги хабарлар ўрганилмоқда.
Қарши шаҳри ҳокимининг биринчи ўринбосари Нурбек Турдиевнинг ходимларга нисбатан қўпол муносабатда бўлгани ҳамда уларни дам олиш кунлари ишга жалб қилгани ҳақидаги хабарлар юзасидан Давлат меҳнат инспекцияси томонидан ўрганиш ишлари бошланди.
Инспекциянинг маълум қилишича, мазкур ҳолат ваколатли орган томонидан назоратга олиниб, мурожаатларда келтирилган ҳолатлар юзасидан тегишли текширув тадбирлари олиб борилмоқда. Ўрганиш натижалари бўйича қўшимча маълумот тақдим этилиши билдирилган.
Аввалроқ ижтимоий тармоқларда мансабдор шахс иштирокидаги видеолавҳа тарқалган эди. Унда онлайн йиғилишга кечикиб қўшилган ходимга нисбатан ҳақоратли ва кескин сўзлар ишлатилгани акс этган.
Мурожаат муаллифлари ҳоким ўринбосари томонидан ходимларга мунтазам равишда босим ўтказилиши, уларнинг шаъни ва қадр-қимматига путур етказувчи муносабатларга йўл қўйилгани ҳамда айрим ҳолларда асоссиз равишда ишдан бўшатиш ҳолатлари кузатилганини таъкидлаган.
Шунингдек, суд қарори билан ишга тикланиши белгиланган айрим ходимларнинг амалда ўз вазифаларига қайтарилмагани юзасидан ҳам эътирозлар билдирилган.
Давлат меҳнат инспекцияси мазкур ҳолатлар юзасидан ўрганиш ишлари давом этаётганини ҳамда якуний хулосалар бўйича жамоатчиликка қўшимча ахборот берилишини маълум қилди.
