Шавкат Мирзиёев Президент Олимпиадаси спорт мусобақаларининг ғолиблари ва иштирокчиларига табрик йўллади
Давлат раҳбари спортчиларнинг ота-оналари, устоз ва мураббийларига миннатдорлик билдирди.
Ўзбекистон Президенти Шавкат Мирзиёев Президент Олимпиадаси спорт мусобақаларининг ғолиблари ва иштирокчиларига табрик йўллади. Давлат раҳбари табригида ёш спортчиларнинг эришган натижаларини эътироф этиб, уларни келгусида халқаро мусобақаларда Ватан шарафини муносиб ҳимоя қилишга ундади.
Президент Олимпиада мусобақалари нафақат спорт беллашуви, балки ёшлар ўртасида дўстлик, ўзаро ҳурмат ва ватанпарварлик туйғуларини мустаҳкамловчи тарбия майдони бўлганини таъкидлади.
Табрикда мусобақаларда юқори натижаларга эришган спортчилар алоҳида қайд этилди. Жумладан, қашқадарёлик Кумуш Кўчкинова дзюдо ва кураш бўйича иккита олтин медални қўлга киритган. Тошкентлик Аиша Енина эса бадиий гимнастика бўйича учта олтин, биттадан кумуш ва бронза медалига сазовор бўлган.
Шунингдек, оғир атлетикачи Муштарий Ўролова 60 килограммдан юқори вазн тоифасида даст кўтаришда 109 килограмм, силтаб кўтаришда 136 килограмм ва икки кураш якунига кўра 245 килограмм натижа қайд этиб, жаҳон рекордини ўрнатгани таъкидланди.
Бундан ташқари, бир қатор ёш спортчилар Ўзбекистон рекордларини янгилаган. Парасузиш баҳсларида андижонлик Ҳикматулла Ҳайдаралиев ва қорақалпоғистонлик Шаҳноза Ережепбаева тўрттадан олтин медални қўлга киритган. Сирдарёлик енгил атлетикачи Дурдона Жуманқулова эса уч кураш баҳсларида 2014 очко жамғариб, 14 ёшли спортчилар орасида энг юқори натижани қайд этган.
Шавкат Мирзиёев барча иштирокчилар мусобақаларда зарур билим ва тажриба орттирганини таъкидлаб, бу беллашувларда мағлублар бўлмаганини қайд этди.
Давлат раҳбари ёш спортчиларнинг келгусида қитъа ва жаҳон чемпионатлари, Олимпия ва Паралимпия ўйинларида ҳам Ўзбекистон шарафини муносиб ҳимоя қилишига ишонч билдирди. Шунингдек, спортчиларнинг ота-оналари, устоз ва мураббийларига миннатдорлик билдирди.
