Тошкентда автобус ҳайдовчиси транспорт воситаси остида қолиб, ҳалок бўлди
Автобуснинг қўл тормози фаоллаштирилмагани оқибатида транспорт воситаси ҳаракатлана бошлаган ва уни тўхтатишга уринган ҳайдовчи автобус остида қолиб кетган.
2026 йил 7 ноябрь куни Тошкент шаҳридаги 82-сонли автобус йўналишида фаолият юритган ҳайдовчи билан бахтсиз ҳодиса юз берди. Бу ҳақда «Тошшаҳартрансхизмат» АЖ ахборот хизмати хабар берди.
Қайд этилишича, “18-автобус саройи” филиалига қарашли автобус ҳайдовчиси J.Z. йўловчиларни бекатда тушириб, транспорт воситасини тўхтатган. Бироқ у автобуснинг қўл тормозини фаоллаштирмасдан, транспорт воситасини тарк этган.
Натижада автобус ўз-ўзидан ҳаракатлана бошлаган. Буни кўрган ҳайдовчи уни тўхтатишга уринган, аммо автобус остида қолиб кетган. Оқибатда ҳайдовчи ҳалок бўлган.
«Тошшаҳартрансхизмат» АЖ раҳбарияти ва жамоаси марҳумнинг оила аъзолари, яқинлари ҳамда ҳамкасбларига чуқур ҳамдардлик билдирди.
