Бизнес таклифи ортидаги фирибгарлик: Ўзбекистонда қидирувда бўлган аёл Туркияда ушланди
У фуқароларга қўшма бизнес таклиф қилиб, катта миқдордаги пулни фирибгарлик йўли билан олганликда гумонланмоқда.
Ўзбекистонда қидирувда бўлган 1991 йилда туғилган М.Н. исмли аёл Туркияда қўлга олиниб, Ўзбекистонга қайтарилди. Бу ҳақда Ўзбекистоннинг Истанбулдаги Бош консуллиги матбуот хизмати хабар берди.
Қайд этилишича, аёл Ўзбекистон ва Туркия ички ишлар вазирликлари ҳамкорлигида ўтказилган тезкор тадбир давомида ушланган.
У фуқароларнинг ишончига кириб, уларга ҳамкорликда бизнес юритишни таклиф қилиш орқали катта миқдордаги маблағларни фирибгарлик йўли билан қўлга киритганликда гумонланмоқда.
Мазкур ҳолат юзасидан Ўзбекистон Республикаси Жиноят кодексининг 168-моддаси 3-қисми билан жиноят иши қўзғатилган.
Айни пайтда икки давлат ҳуқуқни муҳофаза қилувчи органлари ҳамкорлигида қидирувдаги бошқа шахсларни аниқлаш, қўлга олиш ва Ўзбекистонга қайтариш бўйича тадбирлар давом эттирилмоқда.
