Фирибгарларнинг янги тузоғи: Телеграмда сохта суд чақирувлари тарқатилмоқда
Шубҳали файл ёки ҳавола очилиши Телеграм аккаунти ва шахсий маълумотларнинг ўғирланишига олиб келиши мумкин.
Киберфирибгарлар томонидан Телеграм мессенжери орқали фойдаланувчиларни алдашга қаратилган янги фирибгарлик усули кузатилмоқда.
Маълум қилинишича, номаълум шахслар фойдаланувчиларга гўёки судга чақирилгани ҳақида хабарлар юбориб, уларга зарарли АPК файллар ёки шубҳали ҳаволаларни жўнатмоқда.
Мутахассисларнинг таъкидлашича, бундай ҳавола ёки файллар очилган тақдирда, зарарли дастур қурилмага ўрнатилиб, фойдаланувчининг Телеграм аккаунтига ноқонуний кириш имкониятини яратиши мумкин. Натижада вирус автоматик равишда контактлар, гуруҳлар ва бошқа фойдаланувчиларга ҳам тарқатилади.
Шунингдек, фирибгарлар ушбу усул орқали шахсий маълумотлар, Тelegram аккаунтлари, банк карталари реквизитлари ҳамда бошқа махфий маълумотларни қўлга киритишга уриниши мумкин.
Фуқаролардан номаълум манбалардан юборилган ҳаволалар ва АPК файлларни очмаслик, шубҳали хабарларга ишонмаслик ҳамда яқинларини ҳам бундай киберхавфлардан огоҳлантириш сўралади.
