Санкт-Петербургга дронлар ҳужуми уюштирилди
Губернатор аҳолини эҳтиёткорликка чақириб, мобил интернет узилишлари мумкинлиги ҳақида огоҳлантирди.
Россиянинг Санкт-Петербург шаҳри 6 июн куни эрталаб дронлар ёрдамида амалга оширилган кенг кўламли ҳужумга учради. Бу ҳақда шаҳар губернатори Александр Беглов маълум қилди.
Унинг билдиришича, ҳужум вақтида ҳаво мудофааси тизимлари ишга туширилган ва зарур хавфсизлик чоралари кўрилган. Шунингдек, аҳоли эҳтиёткорликка чақирилиб, мобил интернет хизматларида вақтинчалик узилишлар юзага келиши мумкинлиги ҳақида огоҳлантирилган.
Ленинград вилояти губернатори Александр Дрозденко маълумотига кўра, вилоят ҳудуди устида 86 та учувчисиз учиш аппаратлари йўқ қилинган.
Россия Мудофаа вазирлиги эса мамлакатнинг турли ҳудудлари устида жами 376 та дрон уриб туширилганини маълум қилган. Ҳужумлар Белгород вилояти, Брянск вилояти, Калуга вилояти, Курск вилояти, Новгород вилояти, Орел вилояти ва Псков вилояти ҳудудларида ҳам қайд этилгани билдирилган.
Белгород вилоятида Украина Қуролли Кучлари томонидан амалга оширилган ҳужумлар натижасида бир киши ҳалок бўлган ва яна бири яраланган.
