Sog‘liqni saqlash tizimida “sirli mijoz” mexanizmi joriy qilinadi
Monitoring orqali xodimlarning qonunchilikka amal qilishi, xizmat ko‘rsatish sifati va bemorlar bilan muloqot madaniyati o'rganiladi.
Sog‘liqni saqlash vazirligi tizimida korrupsiyaga qarshi kurashish, xizmatlar sifati va tibbiy muassasalarda qonunchilik talablariga rioya etilishini baholash maqsadida “sirli mijoz” instituti faoliyati yo‘lga qo‘yilmoqda. Mazkur mexanizm joriy etilishi Sog‘liqni saqlash vazirining joriy yilning 4-noyabrdagi buyrug‘i bilan tasdiqlangan Nizom asosida amalga oshiriladi.
Unga ko‘ra, “sirli mijoz” metodi orqali vazirlik markaziy apparati hamda zaruratga ko‘ra uning hududiy organlari va muassasalari faoliyati monitoring qilinadi. Tahlil jarayonida qonunbuzilish holatlarini sun’iy ravishda keltirib chiqaruvchi har qanday usuldan foydalanish qat’iyan taqiqlanadi.
Tibbiy xizmat ko‘rsatishda ma’muriy talablar va qonunchilikka amal qilinishi baholanadi. Xodimlarning kasbiy mahorati, murojaatlarga javob berish tezligi hamda bemorlar bilan muloqot madaniyati o‘rganiladi.
“Sirli mijoz” real bemor ko‘rinishida ma’lumot to‘playdi. Monitoring nafaqat muassasaga tashrif buyurgan holda, balki telefon qo‘ng‘iroqlari, elektron murojaatlar va boshqa aloqa vositalari orqali ham amalga oshirilishi mumkin.
Tekshiruv yakunlari belgilangan tartibda rasmiylashtiriladi va yakuniy ma’lumotlar besh ish kuni ichida Odob-axloq komissiyasi tomonidan ko‘rib chiqiladi.
Agar xodimning xatti-harakatida qonunbuzarlik alomatlari aniqlansa, unga nisbatan intizomiy choralar qo‘llanadi. Jinoiy belgi mavjud bo‘lgan holatlar huquqni muhofaza qiluvchi organlarga yuboriladi.
