Истанбулда 6 ёшли ўзбекистонлик бола трамвай ва бекат орасида қолиб, ҳалок бўлди
Болакай Туркияга ота-онаси ва яқинлари билан бирга саёҳат учун келган.
Туркиянинг Истанбул шаҳрида содир бўлган бахтсиз ҳодиса оқибатида 6 ёшли Ўзбекистон фуқароси вафот этди. Бу ҳақда Ўзбекистоннинг Истанбул шаҳридаги Бош консулхонаси маълум қилди.
Маълумотларга кўра, ҳодиса 2026 йил 8 июнь куни Истанбулнинг Фотиҳ туманидаги Лалели мавзесида жойлашган трамвай бекатида юз берган.
Қайд этилишича, вояга етмаган бола трамвайдан тушганидан сўнг бекат платформаси билан трамвай рельслари оралиғида қисилиб қолган. Транспорт воситаси ҳаракатланиши натижасида у оғир тан жароҳатлари олиб, воқеа жойида вафот этган.
Марҳум Туркияга ота-онаси ва яқинлари билан бирга сайёҳ сифатида келгани айтилмоқда.
Ҳозирда Туркия ҳуқуқни муҳофаза қилувчи органлари томонидан ҳодиса юзасидан тергов ҳаракатлари олиб борилмоқда.
Ўзбекистоннинг Истанбулдаги Бош консулхонаси марҳумнинг оила аъзолари ва яқинларига ҳамдардлик билдириб, уларга зарур консуллик-ҳуқуқий ёрдам кўрсатилаётганини маълум қилди.
Шунингдек, дипломатик ваколатхона Истанбул каби йирик шаҳарларда жамоат транспортидан фойдаланишда вояга етмаган болаларни назоратсиз қолдирмаслик ва уларнинг хавфсизлигига алоҳида эътибор қаратишга чақирди.
