Қозоғистонда ЙТҲга учраган 17 ёшли қиз Ўзбекистонга қайтарилди

Қозоғистон, Латвия ва Россияда қийин вазиятга тушиб қолган Ўзбекистон фуқаролари ватанга қайтарди. Бу ҳақда Миграция агентлиги матбуот хизмати маълум қилди.

 

Қайд этилишича, фуқаролардан бири — 17 ёшли қиз Россияга Қозоғистон орқали автотранспортда йўл олаётган вақтда Атираю вилоятида йўл-транспорт ҳодисасига учраган. Оқибатда у оғир тан жароҳатлари олиб, бир неча марта жарроҳлик амалиётини бошдан кечирган.

 

Республика шошилинч тиббий ёрдам илмий маркази мутахассиси маълумотига кўра, беморда бешинчи бўйин умуртқаси сингиши ва орқа мия фаолияти бузилиши аниқланган. У Атирауда икки марта операция қилинганидан сўнг, интенсив терапия назорати остида Ўзбекистонга олиб келинган.

 

Ҳозирда қиз Республика шошилинч тиббий ёрдам илмий марказида даволанмоқда. Шифокорларнинг билдиришича, унинг аҳволи қониқарли.

 

Шунингдек, Латвияга мустақил равишда ишлаш учун борган яна бир Ўзбекистон фуқароси ҳам ватанга қайтарилган. Агентлик маълумотига кўра, у манзилга етиб боргач ваъда қилинган иш ўрни билан таъминланмаган. Кучли руҳий босим оқибатида эса инсультни бошдан кечирган. Даволаниш жараёнидан сўнг шифокорлар назорати остида Ўзбекистонга қайтишига рухсат берилган.

 

Бундан ташқари, Россияда қийин аҳволга тушиб қолган яна бир Ўзбекистон фуқароси ҳам Соғлиқни сақлаш вазирлиги томонидан бириктирилган шифокорлар кузатувида ватанга олиб келинган. 

 

Миграция агентлиги фуқароларни хорижга ишлаш учун фақат хавфсиз, қонуний ва кафолатланган йўллар орқали боришга чақирди. 

 

Шунингдек, идора чет элда оғир вазиятга тушиб қолган Ўзбекистон фуқароларига ёрдам кўрсатиш ишлари давом эттирилаётганини маълум қилди.