Қирғизистон Россияга нота юборди: армияга ёлланган фуқаросини қайтаришни талаб қилди
Қирғизистон 21 ёшли фуқароси Россия армиясига алдов йўли билан жалб қилинганини билдирди.
Қирғизистон Россия Ташқи ишлар вазирлигига Украина урушида Россия армияси сафига алдов йўли билан жалб қилинган фуқаросини ватанига қайтариш талаби билан нота юборди.
Маълумотларга кўра, Талас вилоятидан бўлган 21 ёшли Элистан Тўғотулов 2026 йил кузида ижтимоий тармоқларда Россияда яшовчи ватандошининг иш ҳақидаги эълонига дуч келган. Унга Россияда қўриқчилик ва ҳайдовчилик каби ишларда ойига 110 минг рубль (тахминан 1 340 доллар) маош ваъда қилинган.
Бироқ йигит Россияга боргач, алдов йўли билан мамлакат Мудофаа вазирлиги билан шартнома имзолашга мажбур қилинган. Шундан сўнг у Украинадаги жанговар ҳаракатларга тайёргарлик кўриш учун Воронеж вилоятидаги полигонга юборилган.
Тўғотуловнинг яқинлари 3 ноябрь куни Манас шаҳридан видеомурожаат йўллаб, ҳукуматдан уни ватанига қайтаришга ёрдам беришни сўраган.
Расмий Бишкек Россия томонини йигитни озод қилишга, уни армияга ёллаш ҳолатини текширишга ҳамда бунга алоқадор шахсларни аниқлаб, қонуний жавобгарликка тортишга чақирган.
Шу билан бирга, Қирғизистон расмийлари Россияда бўлиб турган фуқароларини ҳарбий хизматга алдов йўли билан жалб этилиш хавфидан огоҳлантирган.
БМТ Бош ассамблеясининг Украинадаги уруш даврида содир этилган жиноятларни текширувчи мустақил комиссияси октябрь ойи охирида эълон қилган махсус ҳисоботида Россия армиясига алдов ёки мажбурлаш орқали ёллаш ҳолатлари камида 29 мамлакат фуқароларига нисбатан аниқланганини билдирган.
