Ўзбекистонда 2030 йилгача геология ва тоғ-конь саноатига 30 млрд доллардан ортиқ инвестиция жалб этилади

Президент Шавкат Мирзиёевга тоғ-конь саноати ва геология соҳасида рақамли ҳамда сунъий интеллект технологияларини жорий этиш бўйича тақдимотда 2030 йилгача тармоққа 30 миллиард доллардан ортиқ инвестиция жалб қилиш мақсад қилингани маълум қилинди.

 

Қайд этилишича, инвесторларни жалб этиш учун геологик маълумотларнинг сифатли ва ишончли рақамли базасини шакллантириш муҳим аҳамиятга эга. Шу мақсадда Геологик маълумотлар миллий базасини яратиш таклиф этилди. Жараён доирасида “Технологик трансформация маркази” ташкил қилиниб, 36 мингдан ортиқ геологик ҳисобот ва бирламчи маълумотлар рақамли форматга ўтказилади.

 

Мутасаддилар ҳисоб-китобларига кўра, бу геологик маълумотларни шакллантириш, конларни моделлаш ва захираларни ҳисоблаш жараёнларини икки баравар тезлаштиради.

 

Тақдимотда 2026–2030 йилларда геология соҳаси ҳамда йирик саноат корхоналари — Навоий конь-металлургия комбинати, Олмалиқ конь-металлургия комбинати, Навоиюран, Ўзметкомбинат, Ўзбеккўмир ҳамда Ўзбекистон технологик металлар комбинатида сунъий интеллект ва рақамли технологияларни жорий этишга қаратилган 44 та лойиҳани амалга ошириш режалаштирилгани билдирилди.

 

Лойиҳалар ишлаб чиқариш жараёнларини автоматлаштириш, корпоратив бошқарувни рақамлаштириш, сунъий интеллект технологияларини жорий этиш, меҳнат ва саноат хавфсизлигини таъминлаш ҳамда конь-геология ишларини рақамли трансформация қилиш каби беш асосий йўналишни қамраб олади.

 

Маълумотларга кўра, мазкур ташаббуслар натижасида операцион самарадорлик 7 фоизга, техника ва ускуналар ишончлилиги 20 фоизга, энергия самарадорлиги эса 8 фоизга ошиши кутилмоқда. 

 

Шунингдек, инсон омили билан боғлиқ хато ва хавфларни 15 фоизга камайтириш имконияти мавжуд.

 

Тақдимотда яратиладиган технологик ечимларни патентлаш зарурлиги ҳам таъкидланди. 

 

Якунда мутасаддиларга тоғ-конь саноати корхоналарининг бизнес-режаларига ишлаб чиқариш ва меҳнат ресурслари самарадорлигини оширишга қаратилган чораларни киритиш ҳамда технологик ва сунъий интеллект лойиҳалари бўйича алоҳида дастурларни тасдиқлаб бориш юзасидан топшириқлар берилди.