Ўзбекистонда беш йил ичида олтин захираси яна 879 тоннага оширилади
Кумуш захирасини 510 тоннага, мис захирасини эса 676 минг тоннага кўпайтириш режалаштирилган.
Президент Шавкат Мирзиёев тоғ-конь саноати ва геология соҳасида рақамли ҳамда сунъий интеллект технологияларини жорий этиш юзасидан ўтказилган тақдимот билан танишди.
Тақдимотда келгуси беш йил давомида мамлакат олтин захираларини қўшимча 879 тоннага ошириш бўйича ишлар бошланганлиги маълум қилинди. Шунингдек, кумуш захирасини 510 тоннага, мис захирасини эса 676 минг тоннага кўпайтириш режалаштирилган.
Қайд этилишича, геология-қидирув ишларида сунъий интеллект технологияларидан фойдаланиш геологик маълумотларни тезкор таҳлил қилиш, янги конларни аниқлаш ва фойдали қазилмалар захираларини аниқ баҳолаш имконини беради.
Давлат раҳбари соҳада технологик трансформацияни жадаллаштириш, ишлаб чиқариш жараёнларини сунъий интеллект асосида бошқариш ва таҳлил қилиш тизимини ривожлантириш муҳимлигини таъкидлади.
Мутасаддилар ҳисоб-китобларига кўра, рақамли технологиялар ва сунъий интеллект ечимларини кенг жорий этиш маҳсулот таннархини 10 фоизга камайтириш, янги конларни очиш муддатини икки баравар қисқартириш ҳамда инвесторларга тақдим этиладиган таклифлар сонини тўрт баравар ошириш имконини беради.
