Ўзбекистонда параллел қурилиш амалиёти бекор қилинади

 

Ўзбекистонда жорий йилнинг 1 июлидан бошлаб янги обектлар бўйича лойиҳалаштириш ва қурилиш-монтаж ишларини бир вақтда амалга ошириш — яъни параллел қурилиш амалиёти бекор қилинади. Бу ҳақда Президентнинг 104-сонли фармонида белгиланган.

 

Ҳужжатга мувофиқ, эндиликда тажриба-синов тариқасида босқичма-босқич тайёрланадиган лойиҳа асосида қурилиш ишларини амалга ошириш тартиби жорий этилади. Ушбу тартиб доирасида тадбиркорлик субектлари ўз маблағлари ҳамда жалб қилинадиган тўғридан-тўғри хорижий инвестициялар ҳисобидан молиялаштириладиган обектлар (кўп квартирали уй-жойлар бундан мустасно) бўйича қурилиш-монтаж ишларини босқичма-босқич лойиҳа асосида бажариши мумкин бўлади.

 

Қурилиш ишлари ҳар бир босқич бўйича лойиҳа-смета ҳужжатлари экспертизадан ўтказилгач ва инспекция томонидан рўйхатга олингандан сўнг режа-график асосида бошланади. Жараёнлар “Қурилишда давлат назорати” электрон платформаси орқали доимий мониторинг қилинади.

 

Шунингдек, бюджет маблағлари ҳисобидан молиялаштириладиган обектларда ҳам ушбу тартиб фақат Президент ва Вазирлар Маҳкамаси қарор ва фармойишлари асосида жорий этилиши мумкин.

 

Фармонга кўра, Вазирлик ва инспекция томонидан 2027 йил якунига қадар тажриба-синов натижалари таҳлил қилиниб, тизимни кенгайтириш бўйича таклифлар Ҳукуматга киритилади.

 

Бундан ташқари, “Шаффоф қурилиш” миллий ахборот тизими доирасида айрим давлат харидлари бўйича техник топшириқларни экспертизадан ўтказиш амалиёти бекор қилинади.

 

Эслатиб ўтамиз, аввалроқ, қурилиш соҳасида коррупсия хавфини камайтириш мақсадида “сирли мижоз” механизми жорий этилиши ҳақида хабар берилган эди.