Qurilish sohasida “sirli mijoz” usuli joriy etiladi

O‘zbekistonda qurilish sohasida korrupsiya holatlarining oldini olish va profilaktikani kuchaytirish maqsadida “sirli mijoz” mexanizmi joriy etiladi. Bu haqda prezidentning 5-iyundan kuchga kirgan 104-sonli farmonida belgilandi.

 

Hujjatga ko‘ra, 2026-yil oktyabr oyidan boshlab Qurilish va uy-joy kommunal xo‘jaligi sohasida nazorat qilish inspeksiyasining komplayens nazorat xizmati faoliyatida qurilish jarayoni ishtirokchilarining korrupsiyaviy xatti-harakatlarini erta aniqlashga qaratilgan “sirli mijoz” tadbirlari yo‘lga qo‘yiladi. Ushbu tadbirlar har chorakda kamida bir marta o‘tkazilishi belgilangan.

 

Shuningdek, farmonda noqonuniy qurilishlarning oldini olish bo‘yicha ham yangi tartiblar nazarda tutilgan. Xususan, 2026-yil sentyabrdan boshlab yerga oid huquq vujudga kelgan vaqtdan qurilishni boshlashgacha bo‘lgan jarayonda qonunchilik talablariga rioya etilishi bo‘yicha ogohlantirish (eslatma) tizimi joriy etiladi.

 

Bunda yerga egalik huquqini beruvchi hujjatlar — auksion, oldi-sotdi shartnomasi va kadastr hujjatlari rasmiylashtirilishi jarayonida mulkdorlarga OneID tizimi orqali qurilishni boshlash tartibi haqida elektron ogohlantirish yuborilishi ko‘zda tutilgan.

 

2026-yil noyabrdan esa O‘zbekiston mahallalari uyushmasining “online-mahalla.uz” tizimi Qurilish va uy-joy kommunal xo‘jaligi vazirligining “Shaffof qurilish” milliy axborot tizimi bilan integratsiya qilinadi. Natijada mahallalarda hokim yordamchilari hududdagi yangi qurilishlar haqida vakolatli organlarni xabardor qilib boradi.

 

Shuningdek, 2026-yil dekabrga qadar o‘zboshimchalik bilan qurilgan obyektlarni tashqi muhandislik tarmoqlaridan (elektr, suv, yo‘l) uzib qo‘yish tartibini joriy etish bo‘yicha normativ-huquqiy hujjat loyihasi ishlab chiqilib, Vazirlar Mahkamasiga kiritiladi.

 

Ma’lumot uchun, 2025-yilda “sirli mijoz” usulidagi nazorat tizimi mamlakatda tibbiyot, dorixona xizmatlari faoliyatida ham joriy etilgan.