Ўзбекистонда 16 ёшга тўлган ўғил болалар ID-карта асосида автоматик ҳарбий ҳисобга олинади
Мудофаа ишлари бўлимларида амалга ошириладиган тиббий комиссия жараёнлари бекор қилиниб, ушбу кўриклар туман ва шаҳар марказий кўп тармоқли поликлиникаларида ўтказилади.
Ўзбекистонда мудофаа ишлари органлари фаолиятини тубдан ислоҳ қилиш, “нол бюрократия” тамойилини жорий этиш ҳамда ҳарбий ҳисобга олиш жараёнларини тўлиқ рақамлаштириш бўйича янги ташаббуслар илгари сурилмоқда. Бу ҳақда Мудофаа вазири Шуҳрат Холмуҳаммедов маълум қилди.
Тақдимот давомида 16 ёшга тўлган ва ID-карта олган ўғил болалар тўғрисидаги маълумотларни Ички ишлар вазирлигининг ахборот тизими орқали олиш ҳамда уларни автоматик тарзда ҳарбий ҳисобга қўйиш тартибини жорий этиш таклифи маъқулланди.
Шунингдек, амалдаги тартибга кўра мудофаа ишлари бўлимларида амалга ошириладиган тиббий комиссия жараёнларини бекор қилиб, ушбу кўрикларни туман ва шаҳар марказий кўп тармоқли поликлиникаларида ўтказиш тизимига ўтиш режалаштирилмоқда.
Ушбу янгиликлар натижасида фуқаролар учун хизмат кўрсатиш жараёнлари соддалаштирилиб, шаффоф ва рақамли тизим шакллантирилиши, ортиқча бюрократик тўсиқларга барҳам берилиши кутилмоқда.
Президент томонидан мазкур таклифлар маъқулланиб, уларни тезкорлик билан амалиётга татбиқ этиш юзасидан тегишли топшириқлар берилди.
