Дунё бўйлаб 138 миллионга яқин бола меҳнат қилишга мажбур — ХМТ
Халқаро меҳнат ташкилотининг таъкидлашича, 54 миллион бола ҳаёти ва соғлиғи учун хавфли шароитларда ишламоқда
Дунё бўйлаб қарийб 138 миллион нафар бола меҳнат қилишга мажбур бўлмоқда, улардан 54 миллион нафари эса ҳаёти ва соғлиғи учун бевосита хавф туғдирувчи шароитларда ишлаётгани маълум қилинди. Бу ҳақда БМТ маълумотларига таяниб, Халқаро меҳнат ташкилоти (ХМТ) бош директори Гилберт Хоунгбо баёнот берди.
Унинг таъкидлашича, болалар меҳнатининг ҳозирги даражаси халқаро ҳамжамият учун жиддий ташвиш уйғотади ва бу ҳолатни қабул қилиб бўлмайди. ХМТ раҳбари ҳукуматлар, халқаро ташкилотлар ва фуқаролик жамияти вакилларини муаммони бартараф этиш бўйича саъй-ҳаракатларни кучайтиришга чақирди.
Мазкур баёнот ҳар йили 12 июн куни нишонланадиган Бутунжаҳон болалар меҳнатига қарши кураш куни арафасида янграган. Ушбу сана 2002 йилда ХМТ ташаббуси билан болалар эксплуатациясига қарши курашишда халқаро ҳамкорликни кучайтириш мақсадида таъсис этилган.
Қайд этилишича, бугунги кунда миллионлаб болалар таълим олиш, хавфсиз ривожланиш ва тўлақонли болалик ҳуқуқидан маҳрум бўлмоқда. Муаммо айниқса қишлоқ хўжалиги, тоғ-кон саноати ва норасмий иқтисодиёт соҳаларида долзарб бўлиб қолмоқда. Айнан ушбу йўналишларда вояга етмаганлар меҳнатидан фойдаланиш ҳолатлари кўпроқ учрайди.
2026 йилда Бутунжаҳон болалар меҳнатига қарши кураш куни “Болалар меҳнатига қизил карта: болалар учун адолатли шароитлар, катталар учун муносиб иш” шиори остида ўтказилади. ХМТга кўра, болалар меҳнати қашшоқлик, иш ўринларининг етишмаслиги ва ижтимоий ҳимоя тизимларининг заифлиги билан чамбарчас боғлиқ бўлиб, муаммони бартараф этиш комплекс ёндашувни талаб қилади.
Шу муносабат билан Марракеш Глобал Ҳаракатлар Дастурида бир қатор устувор вазифалар белгиланган. Улар қаторига ота-оналар учун муносиб ҳақ тўланадиган иш ўринларини яратиш, болаларнинг сифатли таълим олиш имкониятларини кенгайтириш, ижтимоий ҳимоя тизимларини ривожлантириш ҳамда болалар ҳуқуқларини ҳимоя қилувчи қонунчиликни кучайтириш киради.
Гилберт Хоунгбонинг таъкидлашича, болалар меҳнатини бутунлай йўқ қилиш мумкин, бироқ бунинг учун халқаро ҳамжамиятнинг қатъий сиёсий иродаси ва мувофиқлаштирилган ҳаракатлари зарур.
