Ўзбекистон делегацияси Россия Президенти Администрацияси раҳбарияти билан учрашди

 

Москва шаҳрига амалга оширилган уч кунлик ташриф доирасида Ўзбекистон делегацияси Россия Президенти Администрациясининг қатор раҳбарлари ва мутасаддилари билан учрашувлар ўтказди. Бу ҳақда Президент матбуот котиби Шерзод Асадов маълум қилди.

 

Хусусан, делегация Россия Президенти Администрацияси раҳбарининг биринчи ўринбосари Сергей Кириенко, Президент Администрацияси раҳбарининг ўринбосари – Президент матбуот котиби Дмитрий Песков, Президентнинг стратегик шериклик ва ҳамкорлик бошқармаси бошлиғи Вадим Титов, Президентнинг жамоат лойиҳалари бошқармаси бошлиғи Сергей Новиков ҳамда Президентнинг ахборот-коммуникация технологиялари ва алоқа инфратузилмасини ривожлантириш бошқармаси бошлиғи Татяна Матвеева билан мулоқотлар олиб борди.

 

Ташриф давомида Россиянинг жамоат, ёшлар, медиа ва креатив соҳаларда фаолият юритаётган қатор ташкилотлари вакиллари билан ҳам учрашувлар ташкил этилди.

 

Музокаралар чоғида мунтазам профессионал мулоқотни ривожлантириш, матбуот хизматлари, таҳлилий марказлар ва жамоат ташкилотлари ўртасидаги ҳамкорликни кенгайтириш, тажриба алмашиш ҳамда қўшма таълим ва малака ошириш дастурларини йўлга қўйиш масалаларига алоҳида эътибор қаратилди.

 

Делегация, шунингдек, бошқарув кадрларини тайёрлашга ихтисослашган “Сенеж” бошқарув устахонаси фаолияти билан танишди. Мазкур марказнинг бошқарув кадрларини тайёрлашдаги илғор тажрибаси ва инновацион ёндашувлари катта қизиқиш уйғотди.

 

Ўтказилган учрашувлар медиа ва коммуникациялар соҳасида очиқ мулоқотни ривожлантириш, профессионал тажриба алмашиш ҳамда истиқболли қўшма лойиҳаларни амалга ошириш бўйича томонларнинг тайёрлигини тасдиқлади.