Инсон ҳуқуқлари соҳасидаги ҳамкорлик: Миллий марказ ва БМТ вакиллари учрашуви бўлиб ўтди
Учрашуда Инсон ҳуқуқлари бўйича Ўзбекистон Республикаси миллий маркази ҳамда БМТ Қочқинлар ишлари бўйича Олий комиссари бошқармаси ўртасида 2026-йилга мўлжалланган Қўшма иш режаси имзоланди.
Ўзбекистон Республикаси Инсон ҳуқуқлари бўйича миллий маркази директори Акмал Саидов БМТнинг Қочқинлар ишлари бўйича Олий комиссари бошқармасининг Марказий Осиё бўйича вакили Маҳир Сафарли билан учрашди. Мулоқотда бошқарманинг Марказий Осиё бўйича ҳуқуқий ҳимоя масалалари бўйича мутахассиси Балжан Ошакбаева ҳам иштирок этди.
Учрашув давомида томонлар қочқинлар, бошпана изловчи шахслар ҳамда фуқаролиги бўлмаган шахсларнинг ҳуқуқларини ҳимоя қилиш соҳасидаги ҳамкорликнинг бугунги ҳолати ва истиқболлари юзасидан фикр алмашди. Шунингдек, Инсон ҳуқуқлари бўйича миллий марказ ва БМТ Қочқинлар ишлари бўйича Олий комиссари бошқармаси ўртасидаги ҳамкорлик алоқаларини янада мустаҳкамлаш масалалари муҳокама қилинди.
Учрашув якунида Инсон ҳуқуқлари бўйича Ўзбекистон Республикаси миллий маркази ҳамда БМТ Қочқинлар ишлари бўйича Олий комиссари бошқармаси ўртасида 2026-йилга мўлжалланган Қўшма иш режаси имзоланди.
Мазкур ҳужжатда келгуси давр учун ҳамкорликнинг устувор йўналишлари, жумладан, миллий қонунчилик ва ҳуқуқни қўллаш амалиётини такомиллаштириш, аҳоли ҳамда мутахассислар салоҳиятини мустаҳкамлаш, шунингдек, қочқинлар ва фуқаролиги бўлмаган шахслар ҳуқуқларини ҳимоя қилиш борасидаги халқаро меъёрларни кенг жорий этиш масалалари белгилаб олинди.
Томонлар ўзаро манфаатли ва конструктив ҳамкорликни изчил давом эттириш, эришилган келишувларни амалиётга самарали татбиқ этиш ҳамда инсон ҳуқуқларини таъминлаш соҳасидаги қўшма ташаббусларни янада кенгайтиришга тайёр эканликларини билдирди.
