Қозоғистонда жинсий зўравонлик ишлари аёл терговчиларга топширилади
Янги тартиб жабрланувчиларнинг руҳий ҳолатини ҳимоя қилишга қаратилган.
Қозоғистонда жинсий зўравонлик ва жинсий тажовуз билан боғлиқ жиноят ишларини тергов қилиш учун аёл терговчилар тайинланади. Бу ҳақда мамлакат Ички ишлар вазири ўринбосари Санжар Адилов маълум қилди дейди Казинформ.
Қайд этилишича, янги амалиётнинг асосий мақсади жабрланувчиларнинг қўшимча руҳий босим ва психологик травмага дуч келишини камайтириш, шунингдек, тергов органларига бўлган ишончни мустаҳкамлашдан иборат.
Шунингдек, Ички ишлар вазирлиги мажбурий никоҳ билан боғлиқ жиноятларни қўллаш механизмларига ҳам изоҳ берган. Расмийларнинг таъкидлашича, бундай ҳолатларда жабрланувчи аёл ҳам, эркак ҳам бўлиши мумкин. Бироқ шунчаки никоҳга ундаш ёки таклиф қилиш жиноят сифатида баҳоланмайди.
Маълум қилинишича, жиноят таркиби юзага келиши учун таҳдид, босим ёки зўравонлик аломатлари мавжуд бўлиши керак. Акс ҳолда, бундай муносабатлар фуқаролик-ҳуқуқий масала сифатида кўрилади.
Расмий маълумотларга кўра, ҳозирча Қозоғистонда мажбурий никоҳ бўйича бирорта ҳам жиноий иш қўзғатилмаган. Эслатиб ўтамиз, мамлакатда мажбурий никоҳ 2025-йил сентябр ойидан бошлаб жиноят сифатида белгиланган.
Бундан ташқари, Қозоғистонда таъқиб қилиш (stalking) учун ҳам жиноий жавобгарлик жорий этилган бўлиб, жорий йилнинг ўзида мазкур турдаги 83 та жиноят иши судга юборилган.
