Ноқонуний йўловчи ташиш можароси: Жанубий Кореяда ўзбекистонлик эркак такси ҳайдовчисини калтаклашда гумонланмоқда

 

Жанубий Кореянинг Кёнги провинцияси Хвасонг шаҳрида 30 ёшлардаги Ўзбекистон фуқароси 50 ёшлардаги такси ҳайдовчисини калтаклаганликда гумон қилинмоқда. Ҳодиса ҳайдовчи унинг лицензиясиз, ҳақ эвазига йўловчи ташишига тўсқинлик қилмоқчи бўлганида юз берган.

 

Маҳаллий полиция маълумотларига кўра, воқеа 18 октябрь куни тунги соат 02:00 атрофида Хвасонг шаҳрининг Ҳянгнам ҳудудида содир бўлган.

 

Ҳайдовчи такси тўхташ жойи яқинида шахсий автомобилида хорижлик йўловчиларни олиб кетмоқчи бўлган эркакни кўрган. У эркакнинг ҳаракатини тўхтатишга уринган ва воқеани телефонига ёзиб олиб, полицияга хабар бермоқчи бўлган.

 

Шу пайт эркак ҳайдовчининг жағига мушт туширган. Ҳайдовчи ерга йиқилиб, қисқа муддатга ҳушини йўқотган. Гумонланувчи у йиқилганидан кейин ҳам муштлаш ва тепишда давом этган.

 

Ҳушига келган ҳайдовчи таксиси ичидаги радиоалоқа қурилмаси орқали полицияга хабар берган. Унинг айтишича, ҳодисадан кейин ҳам ишга қайта олмаган.

 

Полиция 22 октябрь куни таксидаги видеокузатув ёзувлари ва яқин атрофдаги кузатув камералари тасвирлари орқали гумонланувчининг шахсини аниқлаган. Ҳуқуқ-тартибот идоралари уни сўроқ қилишни, шунингдек, лицензиясиз йўловчи ташиш билан шуғулланган ёки шуғулланмаганини текширишни режалаштирган. Жабрланувчининг жароҳатлари ҳолатига қараб, гумонланувчига қўйиладиган айбловни тан жароҳати етказиш билан боғлиқ айбловга ўзгартириш масаласи ҳам кўриб чиқилиши мумкин.

 

Хвасонгда ноқонуний йўловчи ташиш муаммоси

 

Хвасонг шаҳрининг хорижлик ишчилар кўп яшайдиган Ҳянгнам, Баран ва Намянг ҳудудларида шахсий автомобилларда ҳақ эвазига йўловчи ташиш ҳолатлари узоқ вақтдан бери муаммо бўлиб келмоқда. Айрим ҳайдовчилар такси бекатларида кутаётган мижозларни лицензияли таксилардан олиб кетиши айтилади.

 

Май ойида Кёнги провинцияси жанубий полицияси Хвасонг ҳудудида ноқонуний йўловчи ташиш орқали кунига 100–150 минг вон даромад олган 29 нафар хорижликни аниқлаган. Уларнинг айримлари ҳайдовчилик гувоҳномасисиз автомобиль бошқаргани ҳам маълум бўлган.