АҚШ Эронга зарба беришга 96 соатда тайёр бўлиши мумкин — СNN
Пентагон энергетика, ҳарбий ва ядровий объектларига эҳтимолий зарбалар учун нишонлар рўйхатини ишлаб чиқмоқда.
АҚШнинг Яқин Шарқдаги ҳарбий кучлари Дональд Трамп буйруқ берган тақдирда, 96 соат ичида Эронга қарши йирик ҳарбий операцияни бошлашга тайёр. Бу ҳақда СNN телеканали манбаларига таяниб хабар берди.
Телеканал манбаларининг таъкидлашича, минтақада эҳтимолий ҳужумларни амалга ошириш учун етарли миқдорда АҚШ ҳарбий кучлари жойлаштирилган. Кутилаётган операциялар кўлами оддий ҳуқуқни муҳофаза қилиш чораларидан кенгроқ бўлиши мумкин.
СNN манбаларига кўра, Исроил бош вазири Бенямин Нетаняху Эронга янги ҳужумлар уюштириш тарафдори бўлган. Бироқ АҚШ расмийлари Вашингтон қўшма операцияларга тайёр бўлгунига қадар кутишни сўраган.
Телеканал хабарида айтилишича, АҚШ Марказий қўмондонлиги ва Пентагон Эроннинг энергетика инфратузилмаси, ҳарбий объектлари ҳамда ядровий иншоотларини қамраб олиши мумкин бўлган нишонлар рўйхатини ишлаб чиқмоқда.
Манбалар эҳтимолий ҳужум буйруғи йил охиригача берилиши мумкинлигини, бироқ операция 3 ноябрь куни АҚШда бўлиб ўтадиган оралиқ сайловлардан кейин бошланиши эҳтимоли борлигини билдирган.
