"Миям ўчиб қолди": Тошкентда бир нечта машинага урилган Cobalt ҳайдовчиси ҳолатга изоҳ берди
Ҳодисадан сўнг ҳайдовчи шаҳар руҳий-асаб касалликлари шифохонасига жойлаштирилган.
Тошкент шаҳрида ички ишлар органлари ходимларининг тўхташ ҳақидаги қонуний талабига бўйсунмай, бир қатор қоидабузарликлар содир этган Cobalt автомобили хизмат қуролидан фойдаланиш орқали тўхтатилганди. Ҳайдовчи ҳодиса юзасидан изоҳ берди.
Маълумотларга кўра, ҳодиса 11 июнь куни соат 21:30 лар атрофида Яккасарой туманидаги Шота Руставели кўчасида содир бўлган. Автомобилни 1982 йилда туғилган, руҳий-асаб касалликлари шифохонасида рўйхатда турувчи фуқаро бошқарган.
Қайд этилишича, ҳайдовчи ички ишлар ходимларининг тўхташ ҳақидаги қонуний талабларини бажармаган, қарама-қарши йўналишга чиқиб кетган, светофорнинг тақиқловчи ишораларига амал қилмаган ҳамда ҳаракат давомида бир нечта автомобилга шикаст етказган.
ИИББга кўра, унинг ҳаракатлари бошқа ҳайдовчилар ва пиёдаларнинг ҳаёти ҳамда саломатлигига жиддий хавф туғдирган.
Ҳайдовчини тўхтатиш мақсадида қўшимча куч ва воситалар жалб қилинган. Бироқ у бир неча бор автомобилдан тушиш ҳақидаги талабларни ҳам бажармаган ва ҳаракатни давом эттиришга уринган. Шундан сўнг хизмат қуролидан фойдаланилган.
Дастлаб ҳавога огоҳлантирувчи ўқ узилган, кейинчалик эса автомобилни тўхтатиш мақсадида унинг ғилдирагига қарата ўқ узилган.
Тошкент шаҳар ИИББ эълон қилган видеода ҳайдовчининг ўзи ҳам воқеага изоҳ бериб, нима сабабдан бундай ҳаракат қилганини эслай олмаётганини айтган.
“Билмайман нима бўлди. Эслай олмайман, тўғриси. Миям ўчиб қолди, менимча. Нега бундай қилганимни билмайман”, — деган у.
ИИББ маълумотига кўра, ҳодисадан сўнг ҳайдовчи шаҳар руҳий-асаб касалликлари шифохонасига жойлаштирилган. Ҳозирда мазкур ҳолат юзасидан терговга қадар текширув ҳаракатлари олиб борилмоқда.
