Нарколаборатория ташкил этганлар 10 йилгача қамалади
Гиёҳванд моддалар ноқонуний айланмасига ҳомийлик қилганлар 8 йилгача қамалиши мумкин.
Ўзбекистонда гиёҳвандлик воситалари ва психотроп моддалар билан боғлиқ жиноятлар учун жавобгарлик кучайтирилди. Айрим қонун ҳужжатларига ўзгартириш ва қўшимчалар киритишни назарда тутувчи қонун қабул қилинди. Бу ҳақда Адлия вазирлиги хабар берди.
Унга кўра, гиёҳвандлик воситалари, психотроп моддалар ёки уларнинг аналогларини ишлаб чиқариш, тайёрлаш ёки қайта ишлаш мақсадида ноқонуний нарколаборатория ташкил этган шахслар 5 йилдан 10 йилгача озодликдан маҳрум қилиниши мумкин.
Шунингдек, гиёҳвандлик воситалари, психотроп моддалар, уларнинг аналоглари ёки кучли таъсир қилувчи моддаларни истеъмол қилиш ва тарқатиш учун бангихона ташкил этиш ёки сақлаш 3 йилдан 5 йилгача озодликдан маҳрум қилиш билан жазоланади.
Қонунга кўра, гиёҳвандлик воситалари, психотроп моддалар ёки уларнинг аналоглари, шунингдек кучли таъсир қилувчи моддаларнинг ноқонуний муомаласига ҳомийлик қилиш учун ҳам жиноий жавобгарлик белгиланган. Бундай қилмиш учун 5 йилдан 8 йилгача озодликдан маҳрум қилиш жазоси қўлланади.
Бундан ташқари, кучли таъсир қилувчи ёки заҳарли моддаларни ўғрилик ёхуд фирибгарлик йўли билан қонунга хилоф равишда эгаллаганлик учун 3 йилгача ахлоқ тузатиш ишлари, 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси назарда тутилган.
