Сурхондарёда уч нафар 18 ёшли йигит чўкиб кетди
Улардан 2 нафарининг жасади топилган бўлиб, яна бирининг жасадини қидириш ишлари давом этмоқда.
Сурхондарё вилоятининг Жарқўрғон туманида дарёга чўмилишга борган ўсмирлардан уч нафари чўкиб кетди. Бу ҳақда Сурхондарё ФВБ хабар берди.
Маълум қилинишича, ҳодиса Намуна маҳалласи ҳудудидан оқиб ўтувчи Сурхондарё дарёсида содир бўлган. 2008 йилда туғилган 6 нафар йигит дарё бўйига борган. Улардан беш нафари чўмилиш учун сувга тушган, бир нафари эса қирғоқда қолган.
Дарёдаги кучли оқим сабаб сувга тушган йигитлар хавфли вазиятга тушиб қолган. Ҳодиса вақтида яқин атрофдаги фуқаролар икки нафар ўсмирни қутқаришга муваффақ бўлган, бироқ қолган уч нафар йигитни сув оқими олиб кетган.
Воқеа жойига қутқарувчилар ва ғаввослар жалб этилган. Қидирув-қутқарув ишлари давомида икки нафар йигитнинг жасади топилган ва сувдан олиб чиқилган.
Маълумотларга кўра, ҳозирда оқим олиб кетган учинчи ўсмирнинг жасадини қидириш ишлари давом эттирилмоқда.
