Тиббиёт муассасаларида “сирли мижоз” тизими жорий этилди
Ушбу махсус мониторинг орқали ортиқча дори ёзиш ва таҳлил тайинлаш ҳолатлари назорат қилинади.
Соғлиқни сақлаш вазирлиги ва Рақобат қўмитаси ўртасида имзоланган меморандумга мувофиқ, айрим тиббиёт муассасаларида ортиқча текширувлар тайинлаш, зарур бўлмаган дори воситалари ва биологик фаол қўшимчаларни тавсия этиш ҳолатларини аниқлаш ва олдини олиш чоралари кучайтирилмоқда.
Мазкур механизмга кўра, Соғлиқни сақлаш вазирлигининг Комплаенс-назорат бошқармаси ҳамда унинг ҳудудий бўлинмалари клиникаларда хизмат кўрсатиш жараёнини таҳлил қилади ва клиник протоколларга риоя этилиши бўйича хулосалар беради.
Вазирлар Маҳкамасининг 2025 йил 22 октябрдаги 667-сон қарори асосида тасдиқланган низомга мувофиқ, дори воситалари ва тиббий хизматлар бўйича назорат “сирли мижоз” усули орқали амалга оширилиши белгиланган.
Қайд этилишича, бундай тадбирлар аудио ва видео қайд этиш воситаларидан яширин фойдаланиш орқали амалга оширилади. Айни пайтда республикадаги барча тиббиёт ташкилотларида “сирли мижоз” тадбирларига старт берилгани маълум қилинди.
