Қашқадарёда “сохта прокурор” ушланди
У захирадаги кичик сержант бўлиб, фуқарони ишга киритиб қўйишни ваъда қилган.
Қашқадарё вилоятида фуқарони ишга жойлаштириб қўйишни ваъда қилган шахс қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.
Қайд этилишича, Бош прокуратура, Департаментнинг Шахсий хавфсизлик бошқармаси ҳамда Департаментнинг Қашқадарё вилояти бошқармаси ходимлари ҳамкорлигида ўтказилган тезкор тадбирда захирадаги кичик сержант У.К. фуқаро А.О.га ўзини гўёки Қашқадарё вилояти прокуратураси ходими сифатида таништирган.
У фуқаронинг укаси Л.О.ни Мудофаа вазирлиги тизимига ишга киритиб қўйишни ваъда қилиб, бунинг эвазига 3 минг АҚШ доллари талаб қилган. Гумонланувчи келишилган пул маблағининг 1,5 минг АҚШ долларини олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 28, 211-моддалари билан жиноят иши қўзғатилиб, тергов ҳаракатлари олиб борилмоқда.
