Хорижий ва нодавлат ОТМлардан давлат университетларига ўқишни кўчириш тартиби белгиланди
Ҳужжатлар тўлиқ тақдим этилмаса ёки нотўғри маълумот киритилса, ариза рад этилиши мумкин.
Ҳукуматнинг тегишли қарори билан хорижий ва нодавлат олий таълим ташкилотларида таҳсил олаётган талабаларнинг ўқишини давлат олий таълим муассасаларига кўчириш бўйича давлат хизматини кўрсатишнинг маъмурий регламенти тасдиқланди. Бу ҳақда Адлия вазирлиги хабар берди.
Янги тартибга кўра, мазкур йўналишдаги ваколатли давлат органи этиб Билим ва малакаларни баҳолаш агентлиги белгиланди.
Регламентга мувофиқ, талабалар ҳар йили 15 июлдан 5 августга қадар Ягона интерактив давлат хизматлари портали, Агентликнинг махсус электрон платформаси ёки Давлат хизматлари марказлари орқали ариза топширишлари мумкин.
Ариза ва унга илова қилинган ҳужжатлар 15 июлдан 6 aвгустга қадар кўриб чиқилади ҳамда ўқишни кўчириш бўйича аризани қабул қилиш ёки рад этиш юзасидан қарор қабул қилинади.
Аризани рад этиш учун ҳужжатларнинг тўлиқ тақдим этилмагани, нотўғри маълумотлар киритилгани ёки белгиланган тўлов ўз вақтида амалга оширилмагани асос бўлади.
Қабул ёки рад этиш ҳақидаги қарор талабага электрон платформалар орқали юборилади. Имтиҳон натижалари эса QR-код шаклида расмийлаштирилиб, тест синовлари якунлангандан сўнг бир ҳафта ичида талабгорга тақдим этилади.
