Тошкентда ноқонуний қурол сотган шахслар ушланди
Сергели туманида рухсатномасиз сақланиб, бир неча бор сотилган пневматик қурол аниқланди. Ҳолат юзасидан тўрт нафар фуқарога нисбатан маъмурий чора кўрилди.
Тошкент шаҳрининг Сергели туманида пневматик қуролни ноқонуний равишда сақлаш ва унинг олди-сотдиси билан шуғулланган фуқаролар аниқланди. Бу ҳақда пойтахт ИИББ ахборот хизмати маълум қилди.
Қайд этилишича, Сергели тумани ИИО ФМБ жиноят қидирув бўлими ходимлари томонидан ўтказилган тезкор тадбир давомида фуқаролардан бирининг хонадонида пневматик қурол сақланаётгани аниқланган.
Ўтказилган текширувлар натижасида ушбу қурол тегишли ҳужжатларсиз тўрт нафар фуқаро ўртасида бир неча бор олди-сотди қилингани маълум бўлган. Қурол охирги харидорнинг уйида ўтказилган тинтув вақтида топилиб, процессуал тартибда расмийлаштириб олинган.
ИИББ маълумотига кўра, “Қурол тўғрисида”ги қонуннинг 6-моддасига асосан пневматик қуроллар фуқаровий қурол таснифига киради ва уларни сақлаш учун тегишли рухсатнома талаб этилади. Аниқланган фуқаролар эса қуролни ҳеч қандай рухсатномасиз сотиб олган ва сақлаб келган.
Ҳолат юзасидан ҳуқуқбузарларга нисбатан Маъмурий жавобгарлик тўғрисидаги кодекснинг 220-1-моддаси билан маъмурий чоралар кўрилган.
Шунингдек, қонунчиликка мувофиқ, пневматик, сигнал берувчи, тиғли совуқ, улоқтириш ҳамда ўзини ўзи ҳимоя қилиш қуролларини ихтиёрий равишда топширган шахслар маъмурий жавобгарликдан озод этилиши эслатиб ўтилди.
