Эрон АҚШ билан меморандумни Трампнинг туғилган кунида имзолашни рад этди
Теҳрон ҳужжат бўйича якуний қарор ҳали қабул қилинмаганини билдириб, тақдим этилган таклифларнинг сиёсий, ҳуқуқий ва техник жиҳатлари ўрганилаётганини маълум қилди.
Эрон АҚШ билан урушни тартибга солиш жараёнини бошлашга қаратилган меморандумни 14 июнь куни имзолашни рад этди. Бу ҳақда Эрон Ташқи ишлар вазирлиги матбуот котиби Исмоил Бақоийга таяниб, DW хабар берди.
Бақоийнинг айтишича, ҳужжат эртаси куни имзоланмайди, бироқ яқин кунларда келишувга эришиш эҳтимоли сақланиб қолмоқда. Бақойи қарши томоннинг “беқарорлиги” сабаб музокаралар жараёнига оид баёнотларда эҳтиёткор бўлиш зарурлигини таъкидлади.
ТИВ вакилига кўра, меморандум ҳарбий ҳаракатларни тўхтатишга қаратилган бўлиб, ҳозирча Эроннинг ядровий дастури масаласи музокаралар кун тартибига киритилмаган.
Эроннинг Ислом инқилоби қўриқчилари корпусига яқин Фарс агентлигининг ёзишича, Теҳрон меморандумнинг Доналд Трамп туғилган куни имзоланишини АҚШнинг сиёсий-рамзий ташаббуси сифатида баҳоламоқда ва бундай сценарийни қўллаб-қувватламайди.
Агентлик манбасига кўра, Эрон ҳукумати меморандумни имзолаш бўйича якуний қарор қабул қилмаган ва тақдим этилган таклифларнинг сиёсий, ҳуқуқий ҳамда техник жиҳатларини ўрганишда давом этмоқда.
Аввалроқ АҚШ президенти Доналд Трамп 11 июнь куни Эрон объектларига режалаштирилган зарбалар бекор қилинганини маълум қилиб, Теҳрон билан келишув 13–14 июнь кунлари имзоланиши мумкинлигини билдирганди.
Ўша куни Исмоил Бақойи меморандумнинг асосий қоидалари деярли келишиб олинганини айтган.
12 июнь куни АҚШ ва Эрон ўртасидаги музокараларда воситачилик қилаётган Покистон бош вазири Шаҳбоз Шариф тинчлик битимининг якуний матни келишиб олинганини маълум қилган, кейинроқ эса якуний тасдиқлаш яқин 24 соат ичида амалга оширилиши мумкинлигини билдирган эди.
