Фарғонада Lacetti ва юк машинаси тўқнашиб, икки киши ҳалок бўлди
ЙТҲга Lacetti-2 ҳайдовчисининг қувиб ўтиш қоидасини бузиб, қарама-қарши ҳаракатланиш йўлагига чиқиб кетгани сабаб бўлган.
Фарғона вилоятининг Ўзбекистон туманида содир бўлган йўл-транспорт ҳодисаси оқибатида икки киши вафот этди. Бу ҳақда вилоят ЙҲХБ хабар берди.
Маълум қилинишича, ҳодиса 14 июнь куни соат 13:30 атрофида D-098 “Қўқон–Яйпан–Исфара” автомобиль йўлининг 21-километрида юз берган.
2008 йилда туғилган аёл ҳайдовчи бошқарувидаги Lacetti-2 автомобили қувиб ўтиш қоидасини бузиб, қарама-қарши ҳаракатланиш йўлагига чиқиб кетган ва ўз йўналишида ҳаракатланиб келаётган FAW Tiger юк автомобили билан тўқнашган.
Оқибатда Lacetti-2 ҳайдовчиси ҳамда автомобилда бўлган 2007 йилда туғилган йўловчи шифохонада вафот этган.
Мазкур ҳолат юзасидан Ўзбекистон тумани ИИБ томонидан терговга қадар текширув ҳаракатлари олиб борилмоқда.
