“Наркожиноятларга қарши курашда томошабин бўлиб туришга ҳеч кимнинг ҳаққи йўқ” — Саида Мирзиёева

 

Президент Администрацияси раҳбари Саида Мирзиёева наркотик воситаларнинг ноқонуний муомаласига қарши курашни кучайтиришга қаратилган янги қонун қабул қилинганини билдириб, ота-оналарни бу муаммога қарши курашда фаол бўлишга чақирди.

 

Унинг таъкидлашича, яқинда қабул қилинган қонун билан яширин нарколабораториялар ва бангихоналар ташкил этиш, наркожиноятларга ҳомийлик қилиш, гиёҳвандлик воситаларини интернет орқали ёки трансмиллий тармоқлар ёрдамида тарқатиш каби оғир қилмишлар учун янги жавобгарлик чоралари жорий этилган. Эндиликда бундай жиноятлар учун 20 йилгача озодликдан маҳрум қилиш жазоси қўлланилиши мумкин.

 

Шунингдек, уюшган наркожиноятчилик учун жавобгарлик сезиларли даражада кучайтирилган. Янги тартибга кўра, наркожиноят содир этган шахслар муддатидан олдин озодликка чиқарилмайди ва жазони тўлиқ ўтайди.

 

Саида Мирзиёева вояга етмаганларни гиёҳвандлик воситаларини истеъмол қилишга ундаш оғир жиноят сифатида баҳоланишини қайд этган. Эндиликда бундай қилмишлар учун 5 йилдан 10 йилгача озодликдан маҳрум қилиш жазоси белгиланган. Таълим муассасалари, талабалар ётоқхоналари ва болалар оромгоҳларида ёшларни наркожиноятларга жалб қилган шахсларга нисбатан ҳам қатъий чоралар қўлланади.

 

Президент Администрацияси раҳбари мазкур қонун жиноятчиларни жазолаш билан бирга, халқ саломатлиги, миллат генофонди ва ёшлар келажагини ҳимоя қилишга хизмат қилишини таъкидлади.

 

У ота-оналарни фарзандлари ҳаётига бефарқ бўлмасликка, наркотиклар таҳдидига қарши курашда давлатнинг энг яқин таянчи бўлишга чақириб, “Болаларимиз келажаги — миллатимиз келажаги. Бу курашда томошабин бўлиб туришга ҳеч кимнинг ҳаққи йўқ”, дея таъкидлаган.