Тошкентда 20 ёшли қизни Дубайга фоҳишалик учун жўнатмоқчи бўлган аёл қўлга олинди
Гумонланувчи қизга чет элдаги танишлари орқали юқори даромадли иш топиб беришни ваъда қилган.
Ички ишлар органлари ва Давлат хавфсизлик хизмати ходимлари ҳамкорлигида ўтказилган тадбир давомида Тошкент вилоятининг Ангрен шаҳрида яшовчи 25 ёшли аёл қўлга олинган. Бу ҳақда Ички ишлар вазирлиги матбуот хизмати хабар берди.
Дастлабки маълумотларга кўра, у Дубай шаҳрида яшовчи танишлари билан жиноий тил бириктириб, Жиззах вилоятининг Мирзачўл туманида яшовчи 20 ёшли фуқаронинг ишончига кирган. Гумонланувчи унга хорижда юқори маошли иш ўринлари мавжудлигини айтиб, чет элга жўнатишга уринган.
Аниқланишича, аслида жабрланувчини Бирлашган Араб Амирликларига жинсий эксплуатация мақсадида олиб чиқиш режалаштирилган. У Тошкент халқаро аеропорти орқали Дубайга жўнатилаётган вақтда тезкор тадбир иштирокчилари томонидан ҳолатга чек қўйилган.
Шунингдек, тергов давомида жабрланувчини Дубай шаҳрида бошқа бир Ўзбекистон фуқароси кутиб олиши режалаштирилгани маълум бўлган.
Мазкур ҳолат юзасидан гумонланувчига нисбатан Жиноят кодексининг 135-моддаси 2-қисмининг тегишли бандлари билан жиноят иши қўзғатилган. Ҳозирда тергов ҳаракатлари олиб борилмоқда.
Ҳуқуқни муҳофаза қилувчи органлар жиноятга алоқадор бўлиши мумкин бўлган бошқа шахсларни аниқлаш ва жавобгарликка тортиш бўйича тезкор-тергов тадбирларини давом эттирмоқда.
