Кўксаройда Албания Президентини расмий кутиб олиш маросими бўлиб ўтди
Маросимдан сўнг Ўзбекистон ва Албания етакчиларининг музокаралари бошланди.
16 июнь куни Кўксарой қароргоҳида Ўзбекистонга расмий ташриф билан келган Албания Президенти Байрам Бегайни тантанали кутиб олиш маросими бўлиб ўтди.
Қароргоҳ олдидаги майдонда фахрий қоровул саф тортди. Ўзбекистон Президенти олий мартабали меҳмонни самимий қарши олиб, шоҳсупага таклиф қилди.
Маросим давомида ҳарбий оркестр ижросида Ўзбекистон ва Албания давлат мадҳиялари янгради. Шундан сўнг давлат раҳбарлари фахрий қоровул сафи олдидан ўтиб, икки мамлакат расмий делегациялари аъзолари билан саломлашдилар.
Расмий кутиб олиш маросими якунлангач, етакчилар биргаликда суратга тушди. Шундан сўнг Ўзбекистон ва Албания ўртасидаги ҳамкорликнинг истиқболли йўналишларига бағишланган олий даражадаги музокаралар бошланди.
