Ўзбекистон АҚШнинг йирик молиявий институтлари билан ҳамкорликни кенгайтиради
Шавкат Мирзиёев АҚШ Эксимбанки ва DFC раҳбарлари билан учрашув ўтказди
Тошкент халқаро инвестиция форуми доирасида Шавкат Мирзиёев АҚШ Эксимбанки президенти ва раиси Жон Ёванович ҳамда Халқаро молиявий тараққиёт корпорацияси (DFC) бош ижрочи директори Бен Блек билан учрашув ўтказди.
Учрашув аввалида АҚШ томонининг юқори мартабали вакиллари давлат раҳбарига Доналд Трампнинг самимий саломи ва эзгу тилакларини етказди.
Музокараларда Ўзбекистонда инфратузилмани ривожлантириш, энергетика, муҳим минералларни ўзлаштириш, сунъий интеллектни жорий этиш ҳамда рақамлаштириш каби стратегик йўналишлардаги йирик лойиҳаларни молиялаштириш масалалари муҳокама қилинди.
АҚШ Эксимбанки билан ҳамкорлик доирасида энергетика тармоғини модернизация қилиш бўйича қўшма лойиҳаларни жадаллаштириш, шунингдек, маҳаллий тадбиркорлар учун экспорт кредитларини кенгайтириш юзасидан келишувга эришилди.
«DFC» корпорацияси билан соғлиқни сақлаш, энергетика ва инфратузилма соҳаларида инвестиция платформасини йўлга қўйиш ташаббуслари қўллаб-қувватланди.
Шунингдек, Тошкентда янги халқаро аэропорт қурилиши, Фарғонада замонавий тиббиёт мажмуаси барпо этилиши, рақамли банк ва дата-марказлар ташкил этилиши каби йирик лойиҳаларни амалий босқичга олиб чиқиш зарурлиги таъкидланди.
Учрашув якунида муҳокама қилинган инвестициявий ва технологик лойиҳалар бўйича қўшма “йўл харитаси”ни ишлаб чиқиш ва қабул қилишга келишиб олинди.
