Ўзбекистон ва Албания раҳбарлари ўртасида музокаралар бўлиб ўтди
Музокаралар якунида Президентлар Фахрий меҳмонлар хиёбонида биргаликда дарахт экди.
Кўксарой қароргоҳида Ўзбекистон Президенти ва Албания Президенти расмий делегациялар иштирокида музокаралар ўтказди.
Учрашувда икки давлат ўртасидаги сиёсий, савдо-иқтисодий, инвестициявий ва маданий-гуманитар ҳамкорликни кенгайтириш истиқболлари муҳокама қилинган.
Шавкат Мирзиёев Ўзбекистон ва Албания муносабатлари тарихида илк бор ўтказилаётган ушбу саммит икки томонлама алоқаларни сифат жиҳатидан янги босқичга олиб чиқишини таъкидлаган.
Музокараларда товар айирбошлаш ҳажмини ошириш, агросаноат мажмуи, «яшил» энергетика, геология, ахборот технологиялари, рақамлаштириш ва туризм соҳаларида қўшма лойиҳаларни амалга ошириш масалаларига алоҳида эътибор қаратилган.
Шунингдек, Ўзбекистон маҳсулотларини Жанубий Европа ва Ўрта ер денгизи бозорларига экспорт қилишда Албаниянинг Дуррес портидан логистика маркази сифатида фойдаланиш имкониятларини ўрганишга келишиб олинган.
Томонлар иқтисодий ва инвестициявий ҳамкорликнинг ҳуқуқий асосларини мустаҳкамлаш, Ҳукуматлараро комиссия ташкил этиш ҳамда унинг илк йиғилишини жорий йилда Тошкент шаҳрида ўтказиш бўйича келишувга эришишган.
Маданий-гуманитар йўналишда эса Маданият кунлари, кино ҳафталиклари, кўргазмалар ва ижодий алмашинув дастурларини йўлга қўйиш муҳимлиги қайд этилган.
Олий даражадаги музокаралар якунида Шавкат Мирзиёев ва Байрам Бегай Фахрий меҳмонлар хиёбонида биргаликда дарахт экди. Ушбу рамзий тадбир Ўзбекистон ва Албания халқлари ўртасидаги дўстлик ва ҳамкорлик алоқаларининг мустаҳкамланиб бораётганини ифодалади.
