Журналистлар уюшмаси аъзолари қайта кўриб чиқилади

Ўзбекистон Журналистлар уюшмасига ОАВ ва медиа вакилларини аъзоликка қабул қилиш ва шу даврга қадар аъзо қилинганлар рўйхатини қайта кўриб чиқиш ишлари олиб борилмоқда. Шуҳрат Орипов раҳбар сифатида иш бошлаганидан сўнг Уюшмага аъзолик масаласини тубдан қайта кўриб чиқиш ташаббусини қўтарди. Хусусан, айни пайтга қадар 2 минг атрофидаги аъзоларнинг 70 фоизини 60 ёшдан ошганларни ташкил этиб, шундан бир қанча вафот этганлар ҳам мавжуд. Ўзбек медиасида ўз ишининг устаси бўлган, профессионал ва узоқ йиллик тажрибага таниқли шахслар, шунингдек, журналситикада фаол бўлган қалами ўткир ёшларнинг Уюшмага аъзо қилинмагани қайд этилди. Шунга кўра, Уюшмада Журналист ва медиа вакилларини аъзоликка қабул қилиш бўйича Комиссия иш бошлади ва янги Низом ишлаб чиқилди.

Эндиликда ўзбек журналистикасининг тараққиётига ўз ижодий материаллари билан ҳисса қўшаётган Ўзбекистон Республикаси фуқароси бўлган, 22 ёшга тўлган ва Уюшма фаолиятида иштирок этаётган шахслар аъзоси бўлиши мумкин қилиб белгиланди. Шунингдек, камида 3 йиллик меҳнат стажи талаб этилади. Бундан ташқари соҳада 20 йилдан ортиқ меҳнат қилган кадрлардан ҳужжатлар топширилишда тависяномалар сўралмайди.

Ушбу Низом асосида иш олиб бораётган Комиссия маълумотларига кўра, жорий бир ой ичида Республика бўйлаб 200 дан ортиқ соҳа вакили Уюшмага қабул қилиш бўйича ҳужжат топширди. Ишчи гуруҳ томонидан ҳужжатлар ўрганилиб, 4 нафар номзодга рад жавоби берилган.

Қайд этилишича, Уюшмага аъзоликка қабул қилиниш эндиликда фақат ўзи номи билан қолиб кетмайди. Аъзоларнинг соҳадаги фаолияти, Уюшма ва жамиятдаги воқеа-ҳодисларга нисабатан фаоллиги эътиборга олинади. Шунга кўра, доимий равишда аъзолар рўйхати ўрганиб борилади, номуносибларни аъзоликдан чиқариш бўйича қарор қабул қилинади.

Эътиборли жиҳати шундаки, Уюшма аъзоси бўлган журналистика соҳаси вакиллари том маънода Уюшма ҳимоясидаги шахсларга айланди. Уларга янги имтиёзлар бериш масалалари ҳам кўриб чиқилмоқда. Хусусан, Уюшма қошида ташкил этилиши кутилаётган ижтимоий-психологик марказдан фақатгина Уюшмага аъзо бўлганларгина фойдаланади. Улар суд билан боғлиқ ҳолатларда бепул адвокатлар билан таъминланади. Шунингдек, саломатликларини тиклаш учун бир нечта сиҳатгоҳларга бепул йўлланмалар бериш йўлга қўйилмоқда. Бундан ташқари эндиликда Ўзбекистон журналистларига берилиши кутилаётган ҳар қандай моддий ёрдам ва имтиёзлардан фойдаланишда, давлат мукофотларига тавсиялар беришда, хорижий давлатларда малака ошириш жараёнларига аввало Уюшма аъзоларига устунлик берилади.