Германия президенти Ўзбекистонга келди
Ташриф дастурига мувофиқ, икки давлат раҳбарларининг тор ва кенгайтирилган таркибдаги музокаралари ўтказилади.
Президент Шавкат Мирзиёевнинг таклифига биноан Германия Президенти Франк-Валтер Штайнмайер рафиқаси ҳамроҳлигида Ўзбекистонга расмий ташриф билан келди.
“Toshkent-Humo” халқаро аэропортида олий мартабали меҳмонни Ўзбекистон Бош вазири ўринбосари Очилбой Раматов ҳамда бошқа расмийлар кутиб олди.
Ташриф дастурига мувофиқ, икки давлат раҳбарларининг тор ва кенгайтирилган таркибдаги музокаралари ўтказилиши режалаштирилган. Унда Ўзбекистон – Германия кўп қиррали муносабатларини янада ривожлантириш истиқболлари муҳокама қилинади.
Томонлар савдо-иқтисодий ҳамкорлик, саноат кооперацияси, энергетика ва “яшил” технологиялар, транспорт ва логистика, фармацевтика ҳамда кимё саноати, қишлоқ хўжалиги каби йўналишларда амалий ҳамкорликни кенгайтиришга алоҳида эътибор қаратадилар.
Шунингдек, таълим ва гуманитар алмашинувларни ривожлантириш масалалари ҳам кун тартибидан ўрин олган. Музокаралар давомида халқаро ва минтақавий аҳамиятга эга долзарб масалалар юзасидан фикр алмашилиши кутилмоқда.
Ташриф доирасида бир қатор янги қўшма лойиҳа ва дастурларни амалга ошириш бўйича келишувларга эришилиши режалаштирилган.
