Шавкат Мирзиёев Қозоғистон Бош вазирини қабул қилди
Учрашувда июль ойидаги Ҳукуматлараро комиссия йиғилиши ва Ақтау шаҳридаги ҳудудлар раҳбарлари Кенгашига тайёргарлик масалалари кўриб чиқилди.
V Тошкент халқаро инвестиция форуми доирасида Шавкат Мирзиёев Қозоғистон Бош вазири Олжас Бектеновни қабул қилди.
Учрашув аввалида Олжас Бектенов давлат раҳбарига Қасим-Жомарт Тоқаевнинг самимий саломи ва эзгу тилакларини етказди.
Мулоқот чоғида Ўзбекистон ва Қозоғистон ўртасидаги стратегик шериклик ҳамда иттифоқчилик муносабатларини янада ривожлантиришнинг долзарб масалалари муҳокама қилинди.
Томонлар барча даражалардаги фаол мулоқот ва ҳамкорликнинг изчил ривожланаётганини мамнуният билан қайд этдилар. Товар айирбошлаш ҳажми ортиб бораётгани, шунингдек, яқинда қабул қилинган янги “йўл харитаси” асосида иқтисодиётнинг устувор тармоқларида кооперация лойиҳалари изчил амалга оширилаётгани таъкидланди.
Шунингдек, июль ойида ўтказиладиган Ҳукуматлараро комиссия йиғилиши ҳамда Қозоғистоннинг Ақтау шаҳрида бўлиб ўтадиган ҳудудлар раҳбарларининг биринчи Кенгашига пухта тайёргарлик кўриш муҳимлиги қайд этилди.
