Тошкент инвестиция форуми: 100 мамлакатдан 4 мингдан зиёда иштирокчи
Форумда Ўзбекистон иқтисодиёти учун 6 та устувор йўналиш белгиланди.
Бу йилги Тошкент халқаро инвестиция форуми дунёнинг 100 дан ортиқ мамлакатидан 4 мингдан зиёда иштирокчини ўзида жамлади. Нуфузли анжуман дастури ғоят сермазмун бўлиб, унда долзарб глобал иқтисодий масалалар муҳокамаси, шунингдек, турли давлатлар ҳукуматлари ва халқаро ташкилотлар вакиллари, йирик инвесторлар ҳамда экспертлар билан икки томонлама ва кўп томонлама учрашувлар ўрин олди.
Форум доирасида Шавкат Мирзиёев мамлакат иқтисодий ўсишини таъминлашга қаратилган олти устувор йўналишни белгилаб берди. Ушбу йўналишлар орасида капитал бозорини ривожлантириш, “яшил” иқтисодиётга ўтиш, сунъий интеллект технологияларини кенг жорий этиш ҳамда инвесторларнинг ҳуқуқий ҳимоясини янада кучайтириш каби муҳим вазифалар мавжуд.
Шунингдек, Ўзбекистон ўзининг инвестициявий жозибадорлигини изчил ошириб бормоқда. Сўнгги беш йил давомида мамлакат иқтисодиётига 123 миллиард доллардан ортиқ инвестициялар жалб этилди. Энди асосий вазифа — эришилган келишувларни реал сектор, бизнес ва аҳоли фаровонлигига хизмат қилувчи амалий лойиҳаларга айлантиришдан иборат экани таъкидланди.
