Тошкентда Volkswagen автомобилларини йиғиш лойиҳаси ишга туширилди
Ўзбекистон ва Германия ўртасида молиявий ҳамкорлик ва грант дастурларини назарда тутувчи келишувлар имзоланди.
Шавкат Мирзиёев ва Германия Президенти Франк-Валтер Штайнмайер музокаралар якунлари бўйича Қўшма баёнот қабул қилиб, кўп қиррали Ўзбекистон–Германия ҳамкорлигини янада мустаҳкамлашга интилишларини тасдиқладилар.
Давлат раҳбарлари Ўзбекистонда қўшма лойиҳаларни амалга ошираётган ҳамда янги ташаббусларни йўлга қўйишни режалаштираётган Германиянинг етакчи компаниялари вакилларини самимий қутладилар.
Учрашув доирасида икки томонлама ҳужжатларни алмашиш маросими ҳам бўлиб ўтди. Унда шаҳарларни барқарор ривожлантиришга қаратилган лойиҳаларни амалга ошириш учун грант маблағлари ажратиш ва имтиёзли молиялаштиришни назарда тутувчи молиявий ҳамкорлик келишувлари имзоланди.
Шунингдек, давлат раҳбарлари ҳузурида бир қатор қўшма инвестиция ва таълим лойиҳаларига старт берилди. Хусусан, Тошкент шаҳрида “Volkswagen” автомобилларини йирик узелли йиғиш ишлаб чиқаришини ташкил этиш, Андижон вилоятида логистика марказини барпо этиш, суюқ маиший ювиш воситалари ишлаб чиқариш, темир йўл соҳаси учун мутахассислар тайёрлаш ҳамда замонавий имтиҳон марказларини очиш каби лойиҳалар шулар жумласидан.
Мазкур ташаббуслар саноат кооперациясини кенгайтириш, инфратузилмани ривожлантириш, янги иш ўринларини яратиш ҳамда Ўзбекистон ва Германия ўртасидаги стратегик шерикликни янада мустаҳкамлашга хизмат қилиши таъкидланди.
