Навоийда рулда ухлаб қолган Cobalt ҳайдовчиси ЙТҲга учраб, вафот этди
2026 йил бошидан буён вилоятда ҳайдовчиларнинг бошқарув вақтида ухлаб қолиши билан боғлиқ 10 та ЙТҲ содир бўлган.
Навоий вилоятининг Томди туманида содир бўлган йўл-транспорт ҳодисаси оқибатида Cobalt автомобили ҳайдовчиси вафот этди.
Вилоят ИИБ маълумотига кўра, ҳодиса 10 июнь куни юз берган. Ҳайдовчи чарчоқ сабаб автомобилни бошқараётган вақтида ухлаб қолган ва оқибатда транспорт воситаси ЙТҲга учраган.
Ҳайдовчига зудлик билан тиббий ёрдам кўрсатилган, бироқ шифокорларнинг саъй-ҳаракатларига қарамай, у шифохонада вафот этган.
Мазкур ҳодиса юзасидан ҳайдовчининг иш жойида муҳокама ўтказилиб, аварияга олиб келган омиллар таҳлил қилинган. Мутасаддилар томонидан ҳайдовчиларга чарчоқ ҳолатида рулга ўтирмаслик, тезликни оширмаслик ҳамда узоқ сафарга чиқишдан олдин етарлича дам олиш тавсия этилган.
Қайд этилишича, жорий йил бошидан буён Навоий вилоятида ҳайдовчиларнинг бошқарув вақтида ухлаб қолиши билан боғлиқ 10 та йўл-транспорт ҳодисаси содир бўлган. Оқибатда уч киши ҳалок бўлган, яна 12 нафар фуқаро турли даражадаги тан жароҳатларини олган.
