Тошкент ва Масқат ўртасида тўғридан-тўғри авиақатновлар йўлга қўйилади
Шавкат Мирзиёев Ўмон Султонлиги иқтисодиёт вазири бошчилигидаги делегацияни қабул қилди.
Президент Шавкат Мирзиёев Тошкент халқаро инвестиция форумида иштирок этиш учун мамлакатимизга келган Ўмон Султонлиги иқтисодиёт вазири Хамис бин Сайф ал-Жабрий бошчилигидаги делегацияни қабул қилди.
Учрашув аввалида Ўмон Султони Ҳайсам бин Ториқ Ол Саиднинг давлат раҳбарига самимий саломи етказилди.
Мулоқот давомида Ўзбекистон ва Ўмон ўртасида савдо-иқтисодий ва инвестиция-молиявий ҳамкорликни янада жадаллаштириш масалалари муҳокама қилинди.
Сўнгги йилларда икки мамлакат ўртасидаги алоқалар фаоллашиб бораётгани, товар айирбошлаш ҳажми изчил ўсаётгани қайд этилди. Ўзбекистон–Ўмон инвестиция компанияси иштирокида бир қатор муҳим лойиҳалар муваффақиятли амалга оширилаётгани алоҳида таъкидланди.
Шунингдек, келгусида пойтахтлар ўртасида тўғридан-тўғри авиақатновлар йўлга қўйилиши режалаштирилгани маълум қилинди.
Томонлар жорий йилда Масқат шаҳрида Ҳукуматлараро қўшма комиссиянинг навбатдаги йиғилишини ўтказишга келишиб олдилар.
Учрашувда транспорт, логистика, геология, электрон тижорат, рақамли инфратузилма ҳамда бошқа истиқболли йўналишларда ҳамкорликни кенгайтириш масалаларига алоҳида эътибор қаратилди.
