Ўзбекистон ва Германия биринчи хонимлари учрашди
Германия биринчи хоними Ўзбекистондаги инклюзив таълим тизимини юқори баҳолади.
Германия Президенти Франк-Валтер Штайнмаернинг Ўзбекистонга расмий ташрифи доирасида Ўзбекистон Биринчи хоними Зироат Мирзиёева ва Германия Биринчи хоними Элке Бюденбендернинг учрашуви бўлиб ўтди.
Мулоқотдан сўнг биринчи хонимлар Ижтимоий ҳимоя миллий агентлиги ҳузуридаги Халқаро инклюзив хаб фаолияти билан яқиндан танишдилар.
Ташриф давомида меҳмонларга мазкур марказнинг инклюзив касбий таълимни ривожлантириш, замонавий таълим технологияларини жорий этиш ҳамда ёшлар, жумладан ногиронлиги бўлган шахсларни меҳнат бозорида талаб юқори бўлган касб ва кўникмаларга ўқитиш бўйича амалга ошираётган ишлари ҳақида маълумот берилди.
Давлат раҳбарларининг рафиқалари марказдаги ўқув устахоналари ва лойиҳалари билан танишиб, таҳсил олаётган ёшлар билан самимий мулоқот қилдилар.
Германия биринчи хоними Элке Бюденбендер Ўзбекистонда инклюзив жамиятни шакллантириш, касбий таълим тизимини такомиллаштириш ва ёшлар учун тенг имкониятлар яратиш борасида амалга оширилаётган амалий ишларни юқори баҳолади.
