Ўзбекистон ва ЙТТБ ўртасидаги лойиҳалар портфели 7 миллиард доллардан ошди
Шавкат Мирзиёев ЙТТБ президенти Одил Рено-Бассо бошчилигидаги делегацияни қабул қилди.
18 июнь куни Шавкат Мирзиёев Хорижий инвесторлар кенгашининг навбатдаги йиғилиши доирасида Европа тикланиш ва тараққиёт банки президенти Одил Рено-Бассо бошчилигидаги делегацияни қабул қилди.
Учрашувда Янги Ўзбекистонда амалга оширилаётган ислоҳотлар дастурини қўллаб-қувватлаш доирасида Европа тикланиш ва тараққиёт банки билан амалий ҳамкорликни янада кенгайтириш ҳамда стратегик шерикликни мустаҳкамлаш масалалари муҳокама қилинди.
Томонлар Ўзбекистон ва ЙТТБ ўртасидаги ҳамкорлик бугунги кунда энг юқори даражага кўтарилганини мамнуният билан қайд этдилар. Ҳозирда мамлакатимиз банкнинг минтақадаги энг йирик ҳамкори ҳисобланади. Устувор йўналишлардаги қўшма лойиҳалар портфели 7 миллиард доллардан ошгани, инвестицияларнинг асосий қисми хусусий секторни ривожлантиришга йўналтирилгани алоҳида таъкидланди.
Экологик транспортни ривожлантириш, темир йўл инфратузилмасини рақамлаштириш, тадбиркорликни қўллаб-қувватлаш, ипотека бозори ҳамда стартаплар экотизимини ривожлантириш соҳаларида янги келишувлар имзолангани мамнуният билан қайд этилди.
Жорий йилда кичик ва ўрта бизнесни кредитлаш ҳажмини кенгайтириш, экспортни молиялаштириш, аёллар ва ёшларни тадбиркорликка ўқитиш дастурларини амалга ошириш, қишлоқ хўжалиги ва озиқ-овқат тармоқларини ривожлантириш, шунингдек, банк-молия тизимини трансформация қилиш жараёнларида ЙТТБ иштирокини кучайтириш устувор вазифалар сифатида белгиланди.
Таълим, соғлиқни сақлаш ҳамда транспорт инфратузилмаси соҳаларида давлат-хусусий шериклик асосидаги лойиҳаларни илгари суриш режалари ҳам қўллаб-қувватланди.
Шунингдек, лойиҳаларни тайёрлаш механизмларини такомиллаштириш ва уларнинг самарадорлигини ошириш мақсадида Европа тикланиш ва тараққиёт банки экспертларини кенг жалб этишдан манфаатдорлик билдирилди.
Учрашувда Хорижий инвесторлар кенгашининг бўлажак тўртинчи йиғилиши кун тартибига доир масалалар ҳам кўриб чиқилди.
