Ўзини Бош прокуратура ходими сифатида таништириб, фирибгарлик қилган шахс қамоққа олинди
У бир неча фуқаронинг ишончига кириб, миллиардлаб сўм ва минглаб доллар маблағни фирибгарлик йўли билан ўзлаштирганликда гумонланмоқда.
Бош прокуратура Шахсий хавфсизлик бошқармаси томонидан ўтказилган тезкор тадбирлар давомида фуқаро А.А. ўзини прокуратура ходими сифатида таништириб, бир неча шахсларнинг мол-мулкини фирибгарлик йўли билан қўлга киритгани аниқланди. Бу ҳақда Бош прокуратура хабар берди.
Тергов маълумотларига кўра, у фуқаролар Б.М. ва С.Ш.нинг ишончига кириб, арзон нархда буғдой маҳсулотини сотиб олиш ва уни қайта ишлаш орқали юқори даромад олиш мумкинлигини айтган. Шу тариқа улардан жами 1,7 миллиард сўм маблағни фирибгарлик йўли билан олган.
Шунингдек, А.А. жабрланувчи М.Т.га тегишли компания учун Тошкент шаҳридаги ер майдони бўйича бекор қилинган қарорни қайта тиклаб беришни ваъда қилиб, эвазига 95 минг АҚШ долларини қўлга киритган.
Терговда аниқланишича, у ижтимоий тармоқ орқали танишган фуқаро И.Н.га ҳам прокуратурада ишлашини айтиб, унинг ишончига кирган. Кейинчалик 2014 йилда ишлаб чиқарилган “Cоbalt” автомашинасини янги “Gentra”га алмаштириб беришни ваъда қилиб, автомашинани олган ҳамда уни бошқа шахсга сотиб юборган.
Бундан ташқари, А.А. таниши А.К.нинг хонадон калити нусхасини қўлга киритиб, унинг сафарда бўлганидан фойдаланган ҳолда уйга ноқонуний кирган ва кўп миқдордаги тилла тақинчоқларни ўғирлаб кетгани маълум қилинди.
2026 йил 18 июнь куни унга нисбатан Жиноят кодексининг фирибгарлик, ўғрилик ҳамда бошқа моддалари билан айблов эълон қилиниб, қамоқ эҳтиёт чораси қўлланилди.
Бош прокуратура мазкур шахснинг хатти-ҳаракатларидан жабрланган ёки у ҳақда қўшимча маълумотга эга бўлган фуқароларни 1161 рақамли ишонч телефони орқали мурожаат қилишга чақирди.
